सबैको सहयोग लिएर अगाडि बढ्ने छु : श्रेष्ठ

काठमाडौं — सरकारले सशस्त्र प्रहरी बल (एपीएफ) का एआईजी सिंहबहादुर श्रेष्ठलाई महानिरीक्षक (आईजीपी) मा बढुवा गरेको छ । मन्त्रिपरिषदको आइतबार बसेको बैठकले एआईजी श्रेष्ठलाई एपीएफको नेतृत्व

सुम्पेको हो । श्रेष्ठले २०७४ चैत २९ सम्म सशस्त्रलाई हाँक्नेछन् । <?xml encoding="UTF-8"??> ‘मैले पाएको जिम्मेवारीलाई संगठनभित्र र बाहिर सबैको सहयोग लिएर सफलतापूर्वक निर्वाह

गर्नेछु,’ श्रेष्ठले कान्तिपुरसँग भने, ‘देश, जनता र संगठनको हितमा भएका ऐन, नियमलाई पालना गर्दै काम गर्नेछु ।’ आईजीपी दुर्जकुमार राईको ३० वर्षे सेवा अवधि फागुनमा ३ मा सकिने भएपछि सरकारले

श्रेष्ठलाई सोही दिनदेखि लागू हुने गरी सशस्त्रको सबभन्दा महत्त्वपूर्ण जिम्मेवारी दिएको हो । श्रेष्ठसँगै एआईजी रहेका कृष्णकुमार तामाङ र जितबहादुर पुन पनि आईजीपी राईसँगै फागुन ३ मै अवकाश

पाउनेछन् । अन्य दुई प्रतिस्पर्धी एआईजीहरू प्रेमकुमार शाही र प्रकाश ओझामा पनि आईजीपी नियुक्तिको दौडमा रहेका थिए । नवनियुक्त आईजीपी श्रेष्ठले नेतृत्व हस्तान्तरण संगठनको नियमित प्रक्रिया भएको

उल्लेख गर्दै भने, ‘व्यक्तिगत काम गर्ने तरिकाले नेतृत्व परिवर्तन हुँदा केही फरक चाहिं पार्नेछ । संगठनलाई देश र जनताको हितमा काम गर्न र गराउन मेरो पहल सधैं भइरहनेछ ।’ काठमाडौं डिल्लीबजारमा

२०१९ साल फागुन १५ मा जन्मिएका श्रेष्ठले २०४४ साल चैत २९ मा प्रहरी निरीक्षकबाट सेवा सुरक्षा निकायमा आफ्नो यात्रा थालेका थिए । देशमा बढो माओवादी द्वन्द्वका कारण सरकारले गठन गरेको सशस्त्र

प्रहरी बलमा श्रेष्ठ २०५८ वैशाख ४ मा स्थानान्तरण भए । त्यस बेला नेपाल सेना र नेपाल प्रहरी दुवैबाट जानेलाई एपीएफमा एक पद माथि दिइएको थियो । श्रेष्ठ प्रहरी नायब उपरीक्षकबाट सशस्त्रमा प्रहरी

उपरीक्षकमा बढुवा भएर आएका थिए । चीनबाट नेसनल डिफेन्स कोर्स गरेका श्रेष्ठले राष्ट्रसंघको शान्ति मिसनमा इस्ट टिमोर र पूर्वयुगोस्लाभियामा काम गरेका छन् । उनले अमेरिका, श्रीलंका, अमेरिका, इटाली,

चीनलगायतका देशमा तालिम लिएका छन् । उनले सशस्त्रको प्रधान कार्यालयको प्रशासन विभाग, मानव स्रोत विकास विभाग, कार्य विभाग, सशस्त्र प्रहरी प्रधान कार्यालय मद्दती तथा सेवा निर्देशनालय, सुरक्षा

महाशाखालगायत संगठनका बाहिनी, गणहरूको नेतृत्व गरिसकेका छन् । सरकारको नीतिअनुसार आफ्नो संगठनले शान्ति मिसनमा भाग लिँदै आएको उल्लेख गर्दै आगामी दिनमा पनि त्यसलाई निरन्तरता दिने उल्लेख गरे ।

प्रकाशित : फाल्गुन १, २०७३ २१:१८ कान्तिपुरका स्तम्भहरु हाम्रो बारेमा यो वेबसाइट कान्तिपुर राष्ट्रिय दैनिकको आधिकारिक न्युज पोर्टल हो । नेपाली भाषाको यो पोर्टलले समाचार, विचार, मनोरञ्जन, खेल,

विश्व, सूचना प्रविधि, भिडियो तथा जीवनका विभिन्न आयामका समाचार र विश्लेषणलाई समेट्छ। पूरा पढ्नुहोस् » उपयोगी लिंकहरु सम्पर्क ठेगाना कान्तिपुर पब्लिकेशन्स् लि. सेन्ट्रल बिजनेस पार्क, थापाथली

काठमाडौं, नेपाल +977-01-5135000 +977-01-5135001 हाम्रा अन्य प्रकाशनहरु © Copyright ekantipur.com