Brain dead: హార్ట్‌బీట్‌ చట్టం.. గర్భిణి బ్రెయిన్‌ డెడ్‌ అయినా పిండాన్ని బతికించేందుకు వైద్యం

ఇంటర్నెట్‌డెస్క్‌: గర్భం దాల్చిన ఓ యువతి అనారోగ్యం కారణంగా బ్రెయిన్‌డెడ్‌కు గురైంది. కానీ కడుపులో పిండాన్ని బతికించేందుకు ఆమెకు వైద్యం అందిస్తున్నారు. యాంటీ అబార్షన్‌ చట్టం ప్రకారం పిండాన్ని

తొలగించే అవకాశం లేకపోవడంతో చికిత్స నిలిపివేయడానికి వైద్యులు నిరాకరించారు. అమెరికాలోని జార్జియాకు చెందిన కుటుంబం ఇష్టంతో సంబంధం లేకుండా ఈ ప్రక్రియ కొనసాగుతోంది (Brain-dead Georgia woman).

జార్జియాలోని అట్లాంటా పట్టణానికి చెందిన ఆడ్రియానా స్మిత్‌ ఒక నర్స్‌. ఎమోరీ యూనివర్సిటీ హాస్పిటల్‌లో విధులు నిర్వర్తిస్తున్నారు. ఫిబ్రవరిలో తొమ్మిది వారాల గర్భిణిగా ఉన్న సమయంలో ఆమెను తలనొప్పి

వేధించింది. వరుసగా తలనొప్పి రావడంతో దగ్గర్లోని ఆసుపత్రికి వెళ్లి వైద్యులకు చూపించుకుందని ఆమె తల్లి ఏప్రిల్ న్యూకిర్క్‌ వెల్లడించారు. ‘‘వారు కొన్ని మందులు ఇచ్చారు. కానీ ఎలాంటి పరీక్షలు,

స్కాన్ చేయలేదు. వారు పరీక్షించి ఉంటే.. సమస్య తెలిసిపోయేది. కానీ ఆమె ఇంటికి వచ్చిన తర్వాత మరోసారి తీవ్ర అనారోగ్యానికి గురైంది. దాంతో నా కుమార్తె పనిచేసే ఆసుపత్రికి తీసుకెళ్లాం.  అక్కడ స్కాన్

చేయగా.. బ్రెయిన్‌లో రక్తం గడ్డకట్టినట్లు గుర్తించారు. ఆమె బ్రెయిన్‌డెడ్ అయిందని వైద్యులు ప్రకటించారు’’ అని ఏప్రిల్ తెలిపారు. అప్పటినుంచి స్మిత్ లైఫ్ సపోర్ట్ మీదే ఉంటుంది. జార్జియా అబార్షన్

చట్టాల ప్రకారం, పిండంలో హృదయ స్పందన ఉంటే.. అబార్షన్‌కు అనుమతి ఉండదు. దీనినే అక్కడ ‘హార్ట్‌బీట్ లా’ అని పిలుస్తుంటారు. ఈ నిబంధన కారణంగా స్మిత్ విషయంలో ఆమె కుటుంబం ఏ నిర్ణయం తీసుకొనే

వీలులేకుండా పోయింది. ప్రస్తుతం ఈ గర్భస్థ శిశువు వయసు 21 వారాలు. ‘‘ఇదంతా నాకు ఎంతో కష్టంగా ఉంది. ఆసుపత్రిలో నా ఎదురుగా నా బిడ్డ కనిపిస్తోంది. కానీ ఆమె అక్కడ లేదు’’ అని ఆవేదన వ్యక్తంచేశారు. ఆ

శిశువు బయట పరిస్థితులను తట్టుకునేవరకు స్మిత్‌ను అలా లైఫ్ సపోర్ట్ మీద కొనసాగించనున్నారు. ‘‘ప్రతి మహిళకు తన జీవితం గురించి నిర్ణయం తీసుకునే హక్కు ఉండాలి. లేకపోతే ఆమె భాగస్వామి, తల్లిదండ్రులకు

ఉండాలి. ఇక్కడ నా ఉద్దేశం గర్భాన్ని తొలగించాలని కాదు. కానీ ఎంచుకునే అవకాశం ఉండాలి. కానీ ఇక్కడ అలాంటిది ఏమీ లేదు. పుట్టబోయే బిడ్డకు ఎలాంటి జీవితం ఉండబోతుందో అని మాకు ఆందోళనగా ఉంది’’ అని

ఏప్రిల్ న్యూకిర్క్‌ వాపోయారు.