Shashi tharoor: నా వ్యాఖ్యల్ని వక్రీకరించారు.. విమర్శలపై స్పందించిన శశిథరూర్‌

ఇంటర్నెట్‌డెస్క్‌: భాజపా అనుకూల వ్యాఖ్యలు చేస్తున్న కాంగ్రెస్‌ నాయకుడు శశిథరూర్‌ (Shashi Tharoor)పై ఆ పార్టీ సహచరుడు ఉదిత్‌రాజ్‌ మండిపడిన సంగతి తెలిసిందే. భాజపా సూపర్‌ అధికార ప్రతినిధిగా

థరూర్‌ను నియమించాలంటూ ఆయన వ్యంగ్య వ్యాఖ్యలు చేశారు. దీనిపై తాజాగా శశిథరూర్‌ స్పందించారు. తాను ప్రస్తుతం జరిగిన ఉగ్రదాడుల గురించి మాత్రమే మాట్లాడానని, గత యుద్ధాల గురించి ప్రస్తావించలేదంటూ

గురువారం ఎక్స్‌లో ఒక పోస్టు పెట్టారు.  ‘నా దగ్గర ఎక్కువ సమయం లేదు. కానీ, గతంలో నియంత్రణరేఖ వెంబడి భారతీయ శౌర్యం గురించి నాకు తెలియదన్నట్లు మాట్లాడుతున్న వారి గురించి నేను ఇప్పుడు

స్పందిస్తున్నా. నేను ఉగ్రవాద దాడులకు వ్యతిరేకంగా తీసుకున్న ప్రతీకార చర్యల గురించే మాట్లాడాను. గత దాడులను గురించి ప్రస్తావించలేదు. ఇటీవల మనపై జరిగిన దాడులను, దానికి మన ప్రభుత్వం స్పందించిన

విధానాల ఆధారంగానే నేను మాట్లాడాను. అయితే.. ఎప్పటిలాగానే కొందరు విమర్శకులు, ట్రోలర్‌లు తమకు తగినట్లుగా నా వ్యాఖ్యలను వక్రీకరించడంలో విజయం సాధించారు. నేను చేయాల్సిన పనులు ఇంకా చాలా ఉన్నాయి’

అని థరూర్‌ రాసుకొచ్చారు.  * శశిథరూర్‌ను భాజపా ప్రతినిధిగా నియమించాలి పనామాలో థరూర్‌ విలేకరులతో మాట్లాడుతూ.. 2016లో నిర్వహించిన సర్జికల్‌ స్ట్రైక్‌ల సందర్భంగా తొలిసారిగా భారత్‌.. పాకిస్థాన్‌

భూభాగంలోకి చొచ్చుకుపోయిందని అన్నట్లు వార్తలు వచ్చాయి. ఆయన వ్యాఖ్యల్ని కాంగ్రెస్‌ (Congress) పార్టీ తీవ్రంగా ఖండించింది. ఈక్రమంలో పార్టీ నేత ఉదిత్‌రాజ్ మాట్లాడుతూ.. ‘ప్రియమైన శశిథరూర్,

మిమ్మల్ని భాజపా సూపర్‌ అధికార ప్రతినిధిగా నియమించేలా ప్రధాని మోదీని ఒప్పించగలిగితే ఎంతో బాగుండేది. మీరు భారత్‌కు తిరిగి వచ్చేలోగానే మిమ్మల్ని విదేశాంగ మంత్రిగా ప్రకటించగలిగితే ఇంకా

బాగుండేది. మోదీ ప్రధానమంత్రి కాక పూర్వం భారత్‌ ఆధీనరేఖను దాటిపోలేదని మీరన్నారు. తద్వారా కాంగ్రెస్‌ భవ్యచరిత్రను అప్రతిష్ఠపాలు చేశారు. 1965లో భారత్‌ పాకిస్థాన్‌లోని లాహోర్‌ సెక్టారులో పలు

ప్రాంతాల్లోకి చొచ్చుకుపోయింది. 1971లో భారత్‌ పాకిస్థాన్‌ను రెండుగా విడగొట్టింది. కేంద్రంలో యూపీఏ అధికారంలో ఉండగా పలు సర్జికల్‌ స్ట్రైక్‌లు నిర్వహించారు. అయితే ఆ విజయాల నుంచి రాజకీయ ప్రయోజనం

పొందేందుకు అప్పట్లో డప్పు వాయించుకోలేదు’ అని పేర్కొన్నారు. మీకు ఎంతో ఇచ్చిన పార్టీపై నిజాయతీ లేకుండా ఎలా వ్యవహరించగలరని థరూర్‌ను ప్రశ్నించారు. ఈ వ్యాఖ్యల పైనే తాజాగా శశిథరూర్‌ స్పందించారు.