Stock market: ఫుల్‌ జోష్‌లో స్టాక్‌ మార్కెట్లు.. సెన్సెక్స్‌ 2500 పాయింట్లు జంప్‌

Stock Market Opening bell: దలాల్‌ స్ట్రీట్‌లో నేడు బుల్‌ పరుగులు తీస్తోంది. సెన్సెక్స్‌, నిఫ్టీ భారీ లాభాల్లో కదలాడుతున్నాయి. Stock Market Opening bell |  ఇంటర్నెట్‌డెస్క్‌: దేశీయ మార్కెట్లు

నేడు ఫుల్‌ జోష్‌లో ఉన్నాయి. భారీ లాభాల్లో కదలాడుతున్నాయి. అంతర్జాతీయ మార్కెట్లలోని సానుకూల సంకేతాలు, భారత్‌-పాక్‌ మధ్య కాల్పుల విరమణ ఒప్పందం వంటి పరిణామాలతో బుల్‌ పరుగులు తీస్తోంది. దీంతో

సెన్సెక్స్‌ ఏకంగా 2500 పాయింట్లకు పైగా పెరగ్గా.. నిఫ్టీ 24,700 మార్క్‌ పైన ట్రేడ్‌ అవుతోంది. మధ్యాహ్నం 12.40 గంటల సమయానికి సెన్సెక్స్‌ 2,532.58  పాయింట్ల లాభంతో 81,987.05 వద్ద ట్రేడవుతోంది.

నిఫ్టీ 789.30 పాయింట్లు ఎగబాకి 24,797.30 దగ్గర కొనసాగుతోంది. సెన్సెక్స్‌ 30 సూచీలో సన్‌ఫార్మా, ఇండస్‌ ఇండ్‌ బ్యాంక్‌ మినహా మిగిలిన షేర్లు లాభాల్లో కొనసాగుతున్నాయి. హెచ్‌సీఎల్‌ టెక్నాలజీస్‌,

ఇన్ఫోసిస్‌, ఎటర్నల్‌, అదానీ పోర్ట్స్‌, టాటా స్టీల్‌ షేర్లు ప్రధానంగా లాభాల్లో ట్రేడవుతున్నాయి. మార్కెట్ల ర్యాలీకి కారణాలివే.. * ‘ఆపరేషన్‌ సిందూర్‌ (Operation Sindoor)’ తర్వాత సైనిక ఘర్షణను

ఆపేందుకు భారత్‌-పాకిస్థాన్‌ మధ్య శనివారం కాల్పుల విరమణ ఒప్పందం కుదిరిన సంగతి తెలిసిందే. ఇరు దేశాల మధ్య ఉద్రిక్త పరిస్థితులు కాస్త తగ్గడం మదుపర్ల సెంటిమెంట్‌ను బలపర్చింది. * ప్రపంచంలోని రెండు

అతిపెద్ద ఆర్థిక వ్యవస్థల మధ్య వాణిజ్య వివాదాన్ని తగ్గించే లక్ష్యంతో అమెరికా-చైనా (US-China) మధ్య జరిగిన చర్చలు సానుకూలంగా ముగిసినట్లు తెలుస్తోంది. వాణిజ్య యుద్ధంలో నష్టాన్ని తగ్గించే దిశగా

ట్రేడ్‌ డీల్‌ (Trade Deal)కు ఇరుదేశాలు సుముఖత చూపించినట్లు వార్తలు వస్తున్నాయి. * ఎప్పటినుంచో చర్చల దశలో ఉన్న భారత్‌- బ్రిటన్ మధ్య వాణిజ్య ఒప్పందం ఖరారైన సంగతి తెలిసిందే. అలాగే స్వేచ్ఛా

వాణిజ్య ఒప్పందంపై తదుపరి దశ చర్చలు జరిపేందుకు భారత్, ఐరోపా సమాఖ్య (ఈయూ) ప్రతినిధులు సోమవారం సమావేశం కానున్నారు. సాధ్యమైనంత త్వరగా మొదటి దశ ఒప్పందం కుదుర్చుకోవడమే లక్ష్యమని అధికార వర్గాలు

తెలిపాయి. అంతర్జాతీయ వాణిజ్య అనిశ్చితుల నేపథ్యంలో.. రెండు దశల్లో ఒప్పందాన్ని కుదుర్చుకునేందుకు ఇరు వర్గాలు అంగీకరించాయి.