Operation sindoor: ఆపరేషన్‌ సిందూర్‌.. పార్లమెంటు ప్రత్యేక సమావేశానికి కేంద్రం నో..

Operation Sindoor: ఆపరేషన్‌ సిందూర్‌పై చర్చ కోసం పార్లమెంట్‌ ప్రత్యేక సమావేశం ఏర్పాటు చేసేందుకు కేంద్రం నిరాసక్తత చూపిస్తున్నట్లు సమాచారం. దిల్లీ: పహల్గాం దాడి అనంతరం నెలకొన్న భారత్‌-పాక్‌

ఉద్రిక్తతలు, ఆపరేషన్‌ సిందూర్‌ (Operation Sindoor)పై చర్చించేందుకు పార్లమెంట్‌లో ప్రత్యేక సమావేశం ఏర్పాటు చేయాలని ప్రతిపక్షాలు డిమాండ్‌ చేస్తున్నాయి. అయితే, ఇందుకు కేంద్రం నిరాసక్తత

కనబరుస్తున్నట్లు తెలుస్తోంది. ప్రత్యేక సమావేశం (Special Session of the Parliament) ఏర్పాటు చేసేందుకు కేంద్రం సముఖంగా లేదని సమాచారం. ఈ మేరకు విశ్వసనీయ వర్గాలను ఉటంకిస్తూ పలు ఆంగ్ల మీడియా

కథనాలు వెల్లడించాయి. ఈ ఏడాది జులైలో జరిగే వర్షాకాల సమావేశాల్లోనే ప్రతిపక్షాలు లేవనెత్తే ప్రశ్నలకు కేంద్రం సమాధానం చెప్పనుంది. పహల్గాం దాడి (Pahalgam Terror attack) అనంతరం జరిగిన పరిణామాలు,

కలసికట్టుగా తీసుకున్న నిర్ణయాలను చర్చించేందుకు పార్లమెంట్‌లో ప్రత్యేక సమావేశం నిర్వహించాలని లోక్‌సభలో విపక్షనేత రాహుల్‌ గాంధీ ఇటీవల ప్రధాని మోదీకి లేఖ రాశారు. ‘‘ఐక్యత, సంఘీభావం అవసరమైన ఈ

తరుణంలో, వీలైనంత త్వరగా ఉభయ సభల్లో ప్రత్యేక సమావేశాన్ని ఏర్పాటుచేయడం ముఖ్యమని విపక్షం భావిస్తోంది’’ అని రాహుల్‌ పేర్కొన్నారు. వీరితో పాటు మరికొందరు విపక్ష ఎంపీలు సైతం ఇదే డిమాండ్‌

వినిపించారు. * పాక్‌కు ఎరేసి ఉచ్చులోకి లాగిన భారత్‌.. ఆ తర్వాత ఏం జరిగిందో తెలుసా..? అయితే, విపక్షాల డిమాండ్‌ను భాజపా నేతలు తోసిపుచ్చారు. ప్రస్తుతం ఆపరేషన్‌ సిందూర్‌ తాత్కాలికంగానే

నిలిచిందని, ఈ సమయంలో అనవసర చర్చలకు తావివ్వొద్దని ప్రతిపక్షాలను దుయ్యబట్టారు. ఆపరేషన్‌ సిందూర్‌ ముగిసిన తర్వాత ప్రత్యేక సమావేశం డిమాండ్‌ను లేవనెత్తాలని సూచించారు. ఈ క్రమంలోనే కేంద్రం కూడా

దీనిపై సుముఖంగా లేనట్లు తాజాగా వార్తలు వినిపిస్తున్నాయి. జులైలో పార్లమెంట్‌ వర్షాకాల సమావేశాలు జరగనున్నాయి.