Sistema de notificacións electrónicas de galicia notifica. Gal

O sistema de notificacións electrónicas de Galicia Notifica.gal é o servizo que permite a cidadáns/ás, empresas e administracións públicas recibir, de forma áxil e sinxela, as notificacións

electrónicas enviadas pola Xunta de Galicia ou por calquera outra administración pública galega adherida a este sistema. PARA QUE SERVE ESTE SISTEMA? Con este servizo, calquera cidadán/á

pode solicitar, de forma voluntaria, que se lle remitan de forma electrónica as notificacións administrativas a través: * Do portal Notifica.gal * Do formulario co que inicia un procedemento

administrativo * En calquera momento posterior, tanto a través do portal como da "Carpeta do cidadán" da sede electrónica da Xunta (modelo "Modificación dos datos de

notificación") CANDO E CON QUE COLECTIVOS USARÁ ESTE SISTEMA A XUNTA DE GALICIA? A Xunta de Galicia remitirá as notificacións de resolucións e actos administrativos por medios

electrónicos e, en todo caso, cando a persoa interesada resulte obrigada a recibilas por esta vía.  A Lei 39/2015, do 1 de outubro, do procedemento administrativo común das administracións

públicas (artigo 14.2) e a Lei 4/2019, de administración dixital de Galicia (artigo 10) establecen a obrigatoriedade de recibir todas as notificacións por vía exclusivamente electrónica para

determinados colectivos. Isto aplica a: * Persoas xurídicas * Entidades sen personalidade xurídica * Profesionais colexiados/as * Empregados/as das administracións públicas (no exercicio

das súas funcións) * Traballadores/as autónomos/as (no exercicio da súa actividade profesional) * Estudantes universitarios/as (no exercicio da súa condición académica) * Persoas que

representen a algunha das anteriormente indicadas COMO FUNCIONA NOTIFICA.GAL? As notificacións realizaranse por medios electrónicos cando así o soliciten os/as cidadáns/ás e, en todo caso,

cando as persoas destinatarias resulten obrigadas. No caso de que se solicite recibir as notificacións por vía electrónica (ou no caso de pertencer a un colectivo obrigado) e cando

transcorresen 10 días naturais desde a posta a disposición da notificación sen que se accedese ao seu contido, a notificación entenderase como rexeitada. Se se elixe a vía postal as

notificacións tamén estarán dispoñibles en Notifica.gal por se desexa acceder a elas de forma electrónica. Neste caso non terá ningunha consecuencia o feito de non ter accedido a esas

notificacións vía electrónica. Notifica.gal remitirá ás persoas destinatarias os avisos da posta á disposición das notificacións, mediante un correo electrónico ou SMS dirixido á conta ou

número de móbil que consta na solicitude realizada. COMO ACCEDER A NOTIFICA.GAL? Para utilizar os servizos de Notifica.gal pode acceder ao portal https://notifica.xunta.gal Deberá dispoñer

dun usuario e clave no servizo Chave365 ou dun certificado de persoa física ou xurídica asociado ao NIF da persoa destinataria e comprobar que o seu navegador e sistema operativo cumpren con

estes requirimentos técnicos. O portal vaille permitir: * Acceder ás notificacións enviadas pola Xunta de Galicia ou por calquera das administracións públicas galegas adheridas a

Notifica.gal * Modificar o medio de notificación (postal ou electrónico) elixido para cada procedemento. * Autorizar a outra persoa a acceder no seu nome ás notificacións. * Actualizar os

seus datos persoais (correo electrónico, teléfono...), que son os que utiliza a plataforma para enviarlle avisos, recordatorios... * Darse de baixa (no caso de que non pertenza a un dos

colectivos obrigados a recibir notificacións electrónicas). COMO ACCEDER ÁS NOTIFICACIÓNS? Para poder acceder a unha notificación electrónica, deberá contar cun usuario e clave no servizo

Chave365 ou cun certificado electrónico de persoa física ou de persoa xurídica asociado ao NIF da persoa destinataria. Lembre que a través do portal de Notifica.gal tamén pode autorizar a

outra persoa a acceder ao contido das súas notificacións.