Папа едзе ў марсэль: візіт мае шырокія мэты - vatican news

22 верасня 2023 года Папа Францішак накіруецца ў французскі Марсэль з двухдзённым візітам. Падкрэсліваецца, што падарожжа мае выключна пастырскі характар. ЯН ГЛІНСКІ Мэта візіту – удзел у

завяршэнні Трэцім саміце краін Міжземнамор’я (Rencontres Mediterraneennes). У межах мерапрыемства Святы Айцец узначаліць цэлебрацыю святой Імшы на стадыёне футбольнага клуба _Алімпік

Марсэль_ з удзелам каля 60 тысяч вернікаў. Аднак, зразумела, што Папа не можа заставацца толькі госцем на сустрэчы моладзі і рэлігійных лідараў з краін Міжземнаморскага басейна. Партовы

горад Марсэль атаясамліваецца з адкрытасцю, але адначасова са злачыннасцю і грамадскімі канфліктамі. Менавіта тут Пантыфік засяродзіцца на праблемах і магчымасцях рэгіёна адносна пытанняў

міграцыі. Паводле праграмы, праз некалькі гадзін пасля прыбыцця Папа сустрэнецца з духавенствам і кансэкраванымі асобамі, каб падбадзёрыць мясцовы Каталіцкі Касцёл, які моцна пацярпеў ад

скандалаў з прычыны сексуальных злоўжыванняў. Завершыцца першы дзень папскага візіту ўдзелам у цырымоніі ўшанавання памяці каля помніка _Ахвярам і героям мора_, які ўжо стагоддзе стаіць пры

ўваходзе ў порт. Францішак, які сам паходзіць з вялікага партовага горада Буэнас-Айрэс, добра ведае рэаліі жыцця людзей мора. Але чакаецца, што ў Марсэлі ён успомніць не толькі маракоў, якія

загінулі пры выкананні службовых абавязкаў, але і многія тысячы мігрантаў, якія страцілі жыццё ў моры. Нявыключана, што падчас сустрэчы з Прэзідэнтам Францыі Пантыфік закране палітычна

вострае пытанне мігрантаў на італьянскім беразе, колькасць якіх драматычна расце. Нагадаем, Старшыня Савета Міністраў Італіі заклікала Францыю і іншыя краіны адкрыць свае порты для людзей з

Паўночнай Афрыкі, якія апынуліся ў Італіі. Варта адзначыць, што кардынал Жан-Марк Авелін, арцыбіскуп Марсэля, выказаўся на прэс-канферэнцыі адносна “гістарычнай памяці аб мірным і плённым

суіснаванні ў Міжземнамор'і”, якую “многія людзі хочуць сцерці і замест гэтага навязаць уласную ідэалогію і страх перад іншымі”. “Але мы выступаем за тое, што, нягледзячы на ўсе

рэальныя пагрозы, ёсць і добрае”, – дадаў іерарх. Акрамя прыватнай сустрэчы з Папам, Эмануэль Макрон таксама плануе прыняць удзел у святой Імшы, падчас якой разам з прысутнымі пачуе зварот

Святога Айца.