Putin - trump: ఉక్రెయిన్‌తో యుద్ధం ముగించేందుకు సిద్ధం: ఫోన్‌లో మాట్లాడుకున్న ట్రంప్‌, పుతిన్‌

మాస్కో: అమెరికా అధ్యక్షుడు డొనాల్డ్‌ ట్రంప్‌ (Donald Trump), రష్యా అధ్యక్షుడు వ్లాదిమిర్‌ పుతిన్‌ (Vladimir Putin) దాదాపు 2 గంటలపైనే ఫోన్‌లో మాట్లాడుకున్నారు. ఈ సందర్భంగా ఉక్రెయిన్‌తో యుద్ధం

(Russia-Ukraine Conflict) ముగించేందుకు సిద్ధంగా ఉన్నట్లు రష్యా అధ్యక్షుడు పుతిన్‌ తెలిపారు. ఇటీవలే టర్కీలో రెండు దేశాల మధ్య నేరుగా చర్చలు ప్రారంభమైన సంగతి తెలిసిందే.  ‘‘రష్యా ఒక శాంతి

ఒప్పందం కోసం ఉక్రెయిన్‌తో కలిసి పనిచేయడానికి సిద్ధంగా ఉంది. అందుకు అమెరికా అధ్యక్షుడు ట్రంప్‌తో అంగీకరించాము. అయితే శాంతి స్థాపనకు సంబంధించి పలు నియమాలు ఉన్నాయి. అందులో ఈ ఒప్పందం ఎప్పటికి

జరగవచ్చో వంటి అంశాలు సైతం ఉన్నాయి’’ అని రిపోర్టర్లతో పుతిన్‌ పేర్కొన్నారు. శాంతి స్థాపన పురోగతికి కాల్పుల విరమణ ఒప్పందం నిబంధనలు సైతం నిర్ణయించాల్సి ఉంటుందని పుతిన్‌ తెలిపారు. అందులో దాని

వ్యవధి ఉంటుందన్నారు. మరోవైపు ఉక్రెయిన్‌, దాని మిత్రదేశాలు తక్షణమే 30 రోజుల పాటు కాల్పులు విరమణ చేయాలని రష్యాను కోరాయి.  రష్యా, ఉక్రెయిన్‌ల మధ్య ప్రత్యక్ష చర్చలు ప్రారంభానికి మద్దతు

ఇచ్చినందుకు ట్రంప్‌నకు పుతిన్‌ ఈ సందర్భంగా ధన్యవాదాలు తెలిపారు. శాంతి స్థాపన పురోగతికి పలు సవాళ్లు ఎదురవుతున్నప్పటికీ రష్యా నిబద్ధతను ట్రంప్‌ అంగీకరించినట్లు పుతిన్‌ తెలిపారు. ప్రస్తుతం

ఇరుదేశాల మధ్య చర్చలు సరైన దిశలోనే సాగుతున్నట్లు పుతిన్‌ తెలిపారు. అయితే శాంతి స్థాపన అనేది సంఘర్షణలకు మూల కారణాలను పరిష్కరించడంపై ఆధారపడి ఉంటుందన్నారు. ఇరుదేశాల్లో శాంతి కోసం ఉత్తమమైన

మార్గాలను వెతకడం ప్రస్తుతం ముఖ్యమని పేర్కొన్నారు.  ఈ ఫోన్‌ కాల్‌ అనంతరం ట్రంప్‌ స్పందించారు. రష్యా, ఉక్రెయిన్‌లు తక్షణమే కాల్పుల విరమణ చర్చలు ప్రారంభిస్తాయని ఆశాభావం వ్యక్తం చేశారు. రష్యా

అధ్యక్షుడితో ఫోన్‌ కాల్‌ అద్భుతంగా సాగినట్లు తెలిపారు. కాల్పుల విరమణ ఒప్పంద అంశం పురోగతిపై ఉక్రెయిన్‌ అధ్యక్షుడు జెలెన్‌స్కీ, యూరోపియన్‌ నేతలతో ట్రంప్‌ మాట్లాడారు. ఈమేరకు సోషల్‌ మీడియాలో

అమెరికా అధ్యక్షుడు పోస్టు చేశారు. ‘‘రెండు దేశాల మధ్యే కాల్పుల విరమణ ఒప్పందం చర్చలు జరగాలి. వారికి ఈ చర్చలు గురించి పూర్తిగా తెలుసు’’ అని ట్రంప్‌ పేర్కొన్నారు.  మరోవైపు పుతిన్‌ నిజాయతీని

యురోపియన్‌ నేతలు అనుమానిస్తున్నారు. ఉక్రెయిన్‌కు సంబంధించి బలవంతమైన శాంతి ఒప్పందం కోసం ట్రంప్‌ ప్రయత్నించవచ్చని వారు ఆందోళన వ్యక్తం చేస్తున్నారు. ఉక్రెయిన్‌, రష్యా మధ్య మూడేళ్లుగా ఈ యుద్ధం

జరుగుతున్న సంగతి తెలిసిందే. 2022 ఫ్రిబవరిలో ఉక్రెయిన్‌పై రష్యా సైనిక చర్యతో ఇది ప్రారంభమైంది. ఇరువైపుల వేల మంది మరణించారు. ఊహించని రీతిలో ఆస్తినష్టం జరిగింది. ఉక్రెయిన్‌లోని పలు నగరాలు

నామరూపాల్లేకుండా తయారయ్యాయి.