Miss canada: పాతబస్తీ అగ్నిప్రమాద ఘటన.. హృదయం బరువెక్కింది: మిస్‌ కెనడా

హైదరాబాద్‌: చార్మినార్‌ సమీపంలోని గుల్జార్‌హౌజ్‌ చౌరస్తా వద్ద ఓ భవనంలో ఘోర అగ్నిప్రమాదం చోటుచేసుకున్న సంగతి తెలిసిందే. ఈ దుర్ఘటనపై మిస్‌ కెనడా ఎమ్మా మారిసన్‌ (Miss Canada Emma Morrison)

స్పందిస్తూ తీవ్ర ఆవేదన వ్యక్తంచేశారు. ఆ ప్రమాదం వార్త విని తన గుండె బద్దలైందన్నారు. ఈమేరకు ఇన్‌స్టాగ్రామ్‌ వేదికగా ఆమె భావోద్వేగభరిత పోస్ట్‌ పెట్టారు. ‘‘పాతబస్తీ అగ్నిప్రమాద ఘటన (Old City

Fire Accident)లో 17 మంది ప్రాణాలు కోల్పోయారన్న వార్త విని నా హృదయం బరువెక్కింది. మృతుల్లో 8 మంది చిన్నారులు ఉండటం మరింత బాధాకరం. ఈ ప్రమాదం కారణంగా ఆయా కుటుంబాలు ఎదుర్కొంటున్న బాధ వర్ణణాతీతం.

పోటీల కోసం భారత్‌కు వచ్చిన మమ్మల్ని ఈ ప్రాంత వాసులు చాలా ఆత్మీయంగా, సాదరంగా ఆహ్వానించారు. ఇప్పుడు వారు తీవ్ర వేదనలో ఉండటం చూసి నా గుండె బద్దలైంది. ఈ విషాద ఘటనలో ప్రియమైన వారిని కోల్పోయిన

కుటుంబాలకు నా ప్రగాఢ సానుభూతి తెలియజేస్తున్నా. ఈ క్లిష్ట పరిస్థితుల్లో బాధిత కుటుంబాల కోసం మనమంతా ప్రార్థిద్దాం’’ అని మిస్‌ కెనడా ఎమ్మా విచారం వ్యక్తంచేశారు. * ఏం జరిగింది?ఎలా జరిగింది?..

పాతబస్తీలో అగ్నిప్రమాదంపై అధికారుల దర్యాప్తు ఎమ్మా మారిసన్‌ ప్రపంచ సుందరి పోటీల్లో కెనడా తరఫున ప్రాతినిధ్యం వహిస్తున్నారు. ప్రస్తుతం మిస్‌ వరల్డ్‌ పోటీల నిమిత్తం ఆమె హైదరాబాద్‌లోనే ఉన్నారు.

ఆదివారం తెల్లవారుజామున ఈ దుర్ఘటన చోటుచేసుకున్న సంగతి తెలిసిందే. ముత్యాల వ్యాపారి ప్రహ్లాద్‌ మోదీ నివాసంలో అగ్నిప్రమాదం చోటుచేసుకోవడంతో ఆయన కుటుంబానికి చెందిన 17 మంది మృతి చెందారు. షార్ట్‌

సర్క్యూట్‌ కారణంగా ఏసీలు పేలి మంటలు చెలరేగడంతో ఈ ప్రమాదం జరిగి ఉంటుందని అనుమానిస్తున్నారు. దీనిపై దర్యాప్తు కొనసాగుతోంది.