Aircraft window shades: విండోషేడ్స్‌ మూసి ఉంచాలి: వాణిజ్య విమానాలకు డీజీసీఏ కీలక సూచన

ఇంటర్నెట్‌డెస్క్‌: వాణిజ్య విమానాలకు డైరెక్టరేట్ జనరల్ ఆఫ్ సివిల్ ఏవియేషన్(DGCA) కీలక సూచన చేసింది. రక్షణశాఖ వైమానిక స్థావరాల్లో విమానాలు టేకాఫ్, ల్యాండింగ్ చేసే సమయంలో విండో షేడ్స్‌

(కిటికీలను కవర్ చేసే వస్త్రం లేక ఇతర మెటీరియల్)ను మూసివేయాలని ఆదేశించింది. మరీ ముఖ్యంగా పాక్‌తో సరిహద్దు ఉన్న పశ్చిమ భారత స్థావరాల వద్ద ఈ సూచన తప్పక పాటించాలని పేర్కొంది. విమానం టేకాఫ్‌ అయిన

తర్వాత 10వేల అడుగుల ఎత్తుకు వెళ్లేవరకు, ల్యాండింగ్ సమయంలో ఈ ఎత్తుకు దిగిన తర్వాత ఆ నిబంధన వర్తిస్తుంది. ఎమర్జెన్సీ కిటికీల దగ్గర మాత్రం ఇందుకు మినహాయింపు ఉందని తెలిపింది (Aircraft window

shades). పాకిస్థాన్‌తో ఇటీవల ఘర్షణలు తీవ్రస్థాయికి చేరిన సంగతి తెలిసిందే. పహల్గాం ఉగ్రదాడికి భారత బలగాలు ఆపరేషన్ సిందూర్‌తో గట్టి బదులిచ్చాయి. అది జీర్ణించుకోలేని పాకిస్థాన్ రెచ్చగొట్టే

చర్యలకు పాల్పడింది. వాటిని భారత్ తిప్పికొట్టింది. తర్వాత రెండు దేశాల మధ్య కాల్పుల విరమణ ఒప్పందం కుదరడంతో ఘర్షణ వాతావరణం సద్దుమణిగింది. కానీ దౌత్యపరమైన ఉద్రిక్తతలు మాత్రం కొనసాగుతున్నాయి. ఈ

నేపథ్యంలోనే డీజీసీఏ సూచనలు చేయడం ప్రాధాన్యం సంతరించుకుంది. అలాగే.. సైనిక స్థావరాల వద్ద ఫొటోగ్రఫీ, వీడియోగ్రఫీపై ఉన్న నిషేధం గురించి ప్రయాణికులను అప్రమత్తం చేయాలని సూచించింది. వాటిని

ఉల్లంఘిస్తే ఎదుర్కోవాల్సిన చర్యల గురించి వెల్లడించాలని విమానయాన సంస్థల నిర్వాహకులకు స్పష్టంచేసింది. ఆపరేషనల్ సేఫ్టీతో పాటు ప్రయాణికులు తమకు తెలియకుండానే రక్షణపరమైన సమాచారాన్ని షేర్ చేయకుండా

నిరోధించేందుకే ఈ చర్యలని తన ప్రకటనలో పేర్కొంది. లేహ్, శ్రీనగర్, జమ్ము, పఠాన్‌కోట్‌, ఆదంపుర్‌, చండీగఢ్‌, బఠిండా, జైసల్మేర్‌, నాల్‌, జోధ్‌పుర్, హిండన్‌, ఆగ్రా, కాన్పుర్‌, బరేలీ, మహారాజ్‌పుర్‌,

గోరఖ్‌పుర్‌, భుజ్‌, లొహెగావ్‌, డాబోలిమ్‌(గోవా) , వైజాగ్‌లోని విమానాశ్రయాలు ఈ ఆదేశాలను కచ్చితంగా పాటించాల్సి ఉంది. ఇదిలాఉంటే.. పాకిస్థాన్‌కు చెందిన విమానాలు భారత గగనతలాన్ని వినియోగించకుండా

కేంద్ర ప్రభుత్వం మరోసారి నిషేధాన్ని పొడిగించింది. గతంలో విధించిన గడువు శుక్రవారంతో ముగిసింది. ఈ నేపథ్యంలో నిషేధాన్ని జూన్‌ 23 వరకు పొడిగిస్తూ కేంద్రం కీలక నిర్ణయం తీసుకున్న సంగతి తెలిసిందే.

మరోవైపు.. భారత విమానాలకు గగనతల మూసివేతను పాకిస్థాన్‌ మరో నెల పాటు పొడిగించింది. జూన్‌ 24 తెల్లవారుజామున 4.59 గంటల వరకు తమ గగనతలంలో భారత విమానాలను నిషేధిస్తున్నట్లు పాకిస్థాన్‌ విమానాశ్రయ

అధికారులు (పీఏఏ) వాయు సిబ్బందికి నోటీసులు జారీ చేశారు. ఇదిలా ఉంటే.. అంతర్జాతీయ సివిల్‌ ఏవియేషన్‌ ఆర్గనైజేషన్‌ నిబంధనల ప్రకారం నెల కంటే ఎక్కువ రోజులు గగనతలం వినియోగించకుండా అడ్డుకోవడం కుదరదు.

అయితే.. ఇరుదేశాలూ నిషేధం గడువును పొడిగించాయి.