Die welt snackt platt: alles rund um das thema plattdeutsch

Na dat Füer in dat Marienkrankenhuus in Hogenfell hebbt se dor nu een Patschent eerstmal fastnahmen. Dat geiht üm en 72 Johr olen Keerl, den se wegen den Brand op’n Kieker hebbt un de

vundaag nu vör‘n Haftrichter kamen deit. Dat Füer weer in’e Nacht na güstern hen op de Statschoon vun’e Geriatrie in’t Parterr utbraken. Dree Patschenten kömen dorbi üm’t Leven bavento sünd

noch 34 bi to Schaden kamen. In Polen hett de rechtskonservative Kandidaat Karol Nawrocki de Stickwahl üm dat Präsidentenamt knapp wunnen. De offizjellen Tahlen na to uurdelen hett he 51

Perzent vun all de Stimmen kregen. Sien Gegensmann weer Rafal Trzaskowski, en liberale Politiker, de pro Europa is un totiets Börgermeester vun Warschau. He hett de Wahl nu mit goot 49

Perzent verloren. An’n Avend segen de Ümfragen noch em vörn. In Billbrook schall en Straat nee trechmaakt warrn un dat in Rekoordtiet. An Steed, dat se mehre Weken bruken doot, schall de

Andreas-Meyer-Straat op den Ring 2 binnen vun söss Daag en ne’en Belag kriegen. So versprickt dat tominnst de Verkehrsbehöörd in Hamborg. Üm dat denn ok hentokriegen, arbeidt de Firmen goors

över Pingsten henweg. Alltohoop mööt se 18.000 Quadraatmeter Stratenbelag neemaken. De Grund, woso dat so hastig gahn mutt, sünd de 25.000 Fohrtüüch, de de Straat jeden Dag bruken doot.

Duersam schüllt se ween de Saken, dat is düsse Week ok dat Motto in Hamborg. Denn hier finnt in’n Rahmen vun’e "Sustainability Week" hunnert Veranstaltens to statt, wo ok de Ideen

vun’e Börgerslüüd bi fraagt sünd. Un deswegen kaamt vundaag un morgen ok goot 1.600 Lüüd ut 113 Länner na de Hannelskamer hen. Hamborg maakt sik Höpen, wat de Olympischen Spelen angahn deit,

dat de hier stattfinnen doot. Un dorvun schullen denn ok de beiden Footballverenen in uns Stadt wat hebben. Dat hett de Spoort-Staatsraat Christoph Holstein in’n Snack mit NDR 90,3 seggt.

En Deel vun den Olympia-Plaan is en ne’et Stadion in’n Volkspark för de Lichtathleten, wat denn later vun’n HSV bruukt warrn schall. As Utgliek kunn de Stadt denn den FC St. Pauli to’t

Bispeel bi’n Utbo vun dat Millerndoorstadion ünner de Arms griepen. Bi den Bunnswettstriet "Jugend forscht" hett de Hamborger Louis Schwarzlose den Pries för en mobile

Forschens-Boje wunnen. Bavento hebbt se dat Gymnasium Farmsen as "School 2025" vun "Jugend forscht" utsöcht, wiel dat se för Mathe, Informatik, Naturwetenschopen un

Technik begeistern doot, so sä dat de Jury. De Siegerehren hett hier bi uns in’e Stadt bi Lufthansa Technik stattfunnen mit Bunnspräsident Frank-Walter Steinmeier as Schirmherren. Blangen de

Sünn sünd vundaag ok de Wulken veel wat togangen. Un de bringt denn ok so af de Middagstiet den eersten Regen mit sik. An’n Namiddag regent dat denn ok duller, deels köönt ok ornlich

Gewidder mit biween. Un de Temperaturen liegt vundaag dagsöver so bi üm un bi twintig Graad. Morgen warrt dat Wedder denn al en ganzen Barg wat beter as vundaag. Denn de Wulken blievt

fründlich, de Sünn kummt mehr wat rut un de Temperaturen liegt morgen so bi üm un bi dreeuntwintig Graad.